Ижын улӥсьёс понна ортчиз тазалыклы сӥзем форум
12.04.2017
Таӵе ужрад 15-тӥ ползэ радъяськиз ини Кун Кенешысь тазалыкез утёнъя, демографияя но семья политикая ялан ужась ӧрилэн но «Единая Россия» партилэн кичӧлтэмзыя.
Таӵе форумъёсын тазалыксэс эскерыны быгатӥзы 10 сюрслэсь ятыр адямиос. Одӥг нунал куспын 8 специалистъёс дорын – кардиолог, эндокринолог, онколог, стоматолог но мукет – эскериськыны луэ.
Форумлэн кулэлыкез сярысь вераз Кун Кенешлэн Тӧроез Владимир Невоструев. «Таяз арын ми элькун бюджетысь коньдон чотын нимысьтыз машина басьтыны чакласькомы. Удмуртиын улӥсьёс быгатозы лек пыктосэн герӟаськем эскеронъёс пыр ортчыны, рентген лэсьтыны», - шуиз со.
Кызьы вераз ялан ужась ӧриен кивалтӥсь Светлана Кривилёва, туэ понна та нырысетӥез ужрад, но ар ӵоже со радъяськоз на ог 7-8 интыын.