Депутатъёс хоккеен шудонъя турнире пыриськизы

Кун Кенешысь депутатъёс Владимир Невоструев кивалтэм улсын хоккеен шудонъя турнире пыриськизы. Ӵошатсконъёс сӥземын вал "Белкамнефть" акционер огазеяськонлэн 20 ар тырмонэзлы. Ортчизы соос нырысетӥ оштолэзе Ижкарысь "Молодёжный" йӧ дворецын.
Турнире пыриськиз ньыль команда: Глазкарысь "Северная столица", Ижкарысь "Камские белки", "Белкамнефть" акционер огазеяськонлэн командаез но Кун Кенешысь но Ижкар думаысь депутатъёслэн огазеям командазы.
"Асьме предприятиосын но организациосын спортэн эшъяськон ӟеч сямлы пӧрмиз ни. Туж шумпотымон, ваньзылы тодмо "Белкамнефть" предприятилэн юбилеезлы сӥзьыса ортытӥське та турнир. "Белкамнефть" элькунысьтымы одӥгез тужгес ӟеч азинскись предприятие, производство ласянь гинэ ӧвӧл лулчеберетэз утён но спортэз азинтон ужын но. Ӵошатсконэ пыриськисьёслы сӥзисько азинскон, тазалык, шудбур но ваньбуро улон. Праздникен! Хоккейлэн праздникеныз!" - шуиз Кун Кенешлэн Тӧроез Владимир Невоструев турнирез сӥё-дано усьтон ужрадын.
«Белкамнефтьлы" тырме 20 ар. Со пӧлысь вить арзэ ми улӥськом хоккеен", - пусйиз «Белкамнефть» акционер огазеяськонлэн кивалтӥсез, Кун Кенешысь депутат Юрий Фёдоров. Та нуналэ со кивалтоно предприятиезлэн командаяз шудӥз.
Турнирын берпуметӥ шудон вал Кун Кенешлэн но "Белкамнефть" огазеяськонлэн командаоссы куспын. Нырысетӥ периодлэн кыкетӥ минутаз ик гол пыртӥз парламентариос понна шудӥсь Олег Гарин, Ижкар думалэн тӧроез. Период йылпумъяськытозь "Белкамнефть" командаысь хоккеистъёс кык гол пыртыса вуттӥзы. Одӥг полаз быгатэмзэ возьматӥз капитанзы Юрий Фёдоров. Нырысетӥ период 20 минут кыстӥськиз, нош кылемез кыкез 15 минутозь кельтэмын вал. Огъя шудон йылпумъяськиз 3:3 лыдын.
Турнирлы йылпумъянъёс лэсьтыса котькуд командаысь усто шудӥсьёс кузьымен пусъемын. Кун Кенешлэн командаяз тужес усто шудӥсен лыдъямын Олег Гарин.