Депутатъёс эскеризы гурт удыслы сётӥськись юрттэтэз

3-тӥ тулыспалэ Кун Кенешын Владимир Варламов кивалтэм улсын гурт удысъя, музъем кусыпъёсъя, инкуазь узырлыкъёсъя но инкуазез утёнъя ялан ужась ӧрилэн заседаниез ортчиз. Депутатъёс эскеризы, кыӵе юрттэт сётӥське бюджетысь гурт удысэз азинтонлы но макем сое быгатыса куто хозяйствоос.
Гурт удысъя но сиён-юон министр Александр Прохоров верамъя, 2016-тӥ арын республикалэн бюджетысьтыз хозяйствоосты азинтыны висъямын вал 1 миллиард 697,6 миллион манет. Та коньдон пӧлысь гуртоос дорозь вуиз 99,6 процентэз. Уноез уксё мынӥз ӟеч выжыысь пудо басьтонлы, коркаос пуктонлы, басьтэм кредитлэсь процентсэ берыктонлы, йӧл понна субсидия басьтонлы, етӥн будэтонэз азинтонлы.
Кылсярысь, туэ 18 сюрс пудолы 96 гид пуктыны чакламын. Одӥг инты понна 50 сюрс манет субсидия сётӥське. Депутатъёс та лыдпусэз будэтон сярысь малпаськыны куризы, угось туала ферма трослы дуногес усе.