Версия для слабовидящих
Егит эмчиослы но фельдшеръёслы Удмуртиын 300-ысен 500 сюрс манетозь коньдон тырозы

Егит эмчиослы но фельдшеръёслы Удмуртиын 300-ысен 500 сюрс манетозь коньдон тырозы

13.12.2016
Удмуртиын егит эмчиослы но фельдшеръёслы 300-ысен 500 сюрс манетозь коньдон тырозы, соос гуртъёсысь ФАП-ёсы ужаны мынӥзы ке яке 5 ар ӝог эмъюрттэт сётон удысын, яке участокъя терапевт луыса ужазы ке. Улосвыл катэ сыӵе тупатон пыртӥзы Кун Кенешысь депутатъёс 13-тӥ толсуре.
«Эмчиослы 500 сюрс манет тыр одӥг пол тыриськись коньдон чаклаське, соос эмъюрттэт сётонъя кун ужъюртын участокъя терапевт яке ӝог эмъюрттэт сётӥсь эмчи луыса 5 ар ужазы ке. Со нырысетӥ эсэп. Кыкетӥез эсэп — ми гуртъёсы ФАП-ёс пуктӥськом. Но гуртъёсын та вакытэ 60 фельдшеръёс но 18 акушеръёс уг тырмо. Соин ик мукетыз эсэп — гуртъёсы со фельдшер-акушер пунктъёсы ужаны мынӥсь фельдшеръёслы одӥг пол тыриськись коньдон. Солэн быдӟалаез 300 сюрс манет луоз. Куронъёсыз сыӵе ик — 5 ар ужано. Осконмы вань, вить ар ӵоже егит эмчи коллективен юн кусыпъёс кылдытоз, выжы лэзёз но со ужъюртэ ик ужаны кылёз шуыса», — пусйиз Удмуртиысь тазалыкез утёнъя министр Алексей Чуршин.
Солэн кылъёсызъя, со гуртъёсын но, каръёсын но эмъюрттэт сётонлэсь пайдалыксэ ӝутыны луонлык сётоз.
Эсэп 2017-тӥ арын 1-тӥ толшорысен ужаны кутскоз. 92 ӧнерчиослы коньдон висъян понна вуоно арын ини элькун коньдэтысь 36 млн манет висъяны чакламын.

Возврат к списку