Муниципал кылдытэтъёсысь быръем ёзэсъёслэн кивалтӥсьёсынызы пумиськон ортчиз

18-тӥ коньывуонэ Кун Кенешлэн Тӧроез Владимир Невоструев кивалтэм улсын муниципал кылдытэтъёсысь быръем ёзэсъёслэн кивалтӥсьёсынызы семинар-кенешон ортчиз Удмуртиысь элькун парламентын.
Семинарез усьтыса, Владимир Невоструев пусйиз, дышем сямъя, Кун Кенеш мыло-кыдо ужа вань каръёсысь, ёросъёсысь но поселениосысь быръем ёзэсъёсысь депутатъёсын. Солэн верамезъя, каръёсын но ёросъёсын улӥсьёс быдэстымтэ ужпумъёслы гинэ саклык уг висъяло, ужъя ӵектонъёссэс но верало.
«Тӥ ужаны кулэ вань депутатъёсын, кудъёсыз асьмелэн быръемын ёрос кенешъёсы, партиен герӟаськемзэс ӧвӧл учконо. Котькудӥзлэсь куаразэ кылоно. Ёросысь югдурез валан понна со туж кулэ. «Единая Россия» троссэ интыосты басьтӥз, мукетъёссэ ми ум кылӥське шуыса ӧвӧл малпано. Сыӵеез луыны кулэ ӧвӧл. Тӥ вань вуись юанъёслы, ӵектонъёслы саклык висъяны кулэ. Мон вань депутатъёсын ӵош ужаны курисько», — вазиськиз люкаськемъёслы Владимир Невоструев.
Ёросъёсысь депутатъёслэн валтӥсь ужпумъёссы пӧлын со пусйиз интывыллэсь инвестициосъя имиджзэ кылдытон, ӵектосъёсты быдэстонэ коньдонзэс поныны мылкыд карись компаниосты утчан ужез.
Владимир Невоструевлэн верамезъя, улосвыл парламент оске, кар думаосысь но ёрос кенешъёсысь депутатъёс кат кылдытонъя кичӧлтонъёсын но потылозы шуыса.
Кун Кенешысь депутатъёслэн вань ӧриоссылэн кивалтӥсьёссы кар думаосысь но ёрос кенешъёсысь ужъюлтошъёсынызы валче ужан, форумъёс, ужъя пумиськонъёс, котырес ӝӧкъёс ортчытъян опытсы сярысь веразы.
«Ми туннэ выльысен кутскиськомы, шонер сюресэтӥ мынон понна троссэ тодыны, валаны кулэ. Ивортодэт басьтон ласянь та семинар туж узыр, нош валтӥсез, ваньмызлы пайдаё — выль быръем муртъёслы но, ёрос кенешын азьвыл ужамъёслы но», — вераз Шаркан ёросысь депутатъёслэн Кенешсылэн кивалтӥсез Дмитрий Орлов.
Удмуртиысь парламентлэн Тӧроез Владимир Невоструев верамъя, таӵе пумиськонъёс Кун Кенешын ялан ортчытъяськозы. Со сяна, кар думаосысь но ёрос кенешъёсысь депутатъёсын кустовой кенешъёс радъялляны чакламын.