Удмуртилэн бюджетаз витетӥзэ воштонъёс пыртэмын

27-тӥ сентябре Владимир Невоструев кивалтэм улсын ортчиз Кун Кенешлэн 26-тӥ сессиез. Эскериськиз 30 пала ужпум. Пӧлазы — 18 пӧртэм законъёслэн проектъёссы. Валтӥсез — 2016-тӥ арлы бюджетэ воштонъёс пыртон.
Туэ арлы бюджетэ ватсанъёс пыртон сярысь законопроектэн тодматӥз коньдон ужпумъёсъя министрлэн воштӥсез Вера Сухих. Со пусйиз, Удмуртилэн бюджетэзлэн доход люкетэз 5 миллиард 403 миллион 354 сюрс манетлы будэ. Озьыен, сомындалы ик будэ расход люкетэз но. Та коньдон мыноз бюджет удысын тыршисьёслы уждун тыронлы, муниципал кылдытэтъёслы дотациослы, нылпиосты сюдонъя программаез улонэ пыӵатонлы, куинь но тросгес нылпи ваемъёслы толэзьлы быдэ тыриськонъёслы но мукет.
Сессиын ик Удмуртилэн Тӧроез Александр Соловьев дэмлаз бюджетлэсь доход люкетсэ эшшо 1 миллиард 355 миллион 800 сюрс манетлы будэтыны. Ваньбур поттонлы вытъёс, пӧртэм трансфертъёс чотын, пе, сое лэсьтыны луоз. Озьы 1 миллиард манет мыноз на лэсьтӥськонлы, 200 миллион — йӧл поттонъя программаез пыӵатонлы, 50 миллион — вылӥ технологиосъя эмъюрттэт сётонлы, кылемез — пӧртэм министерствоослы но ведомствоослы.
Та дэмланэз Кун Кенешысь депутатъёс умоен пусйизы но законопроектлэсь ӵектоссэ кыкетӥ лыдӟемен кутӥзы.