Удмуртилэн Кун Кенешысьтыз депутатъёс урожаез страховать карон куронъёсты воштыны ӵектӥзы

Удмуртилэн Кун Кенешысьтыз депутатъёс Владимир Невоструев кивалтэм улсын нырысетӥ сӥзьыл сессиязы урожаез страховать каронъя выль куронъёсты Кун Думаын эскерыны ӵектон понна куара сётӥзы. Кызьы ивортӥзы элькун парламентлэн пресс-службаяз, ӵектонъёс герӟаськемын «Гурт возёсэз азинтон сярысь» но «Гурт возёс утетлы кун ласянь юрттэт сётон сярысь» катъёсын.
«Страховой учыр кылдэмен лыдъяны ӵектӥськомы нимаз фермерлэн бырем культураезлэсь берло 5 аръёс ӵоже шоро-куспо удалтонлыксэ лыдэ басьтыса, 20 процентэз но солэсь ятырез урожай быре ке», — вераз Кун Кенешысь агропром огъетъя, музъем кусыпъёсъя, инкуазь узырлыкез кутонъя но инкуазез утёнъя ӧрилэн кивалтӥсез Владимир Варламов.
Али ужась катын со лыдпус чаклам урожайлэсь лыдъяське.
Ужкагазлы валэктонын верамын, выль амал гурт возёсъёслэсь ыштонъёссэс зэмос дунъяны юрттоз, со страховательлэсь но, страховщикъёслэсь но тунсыкъёссэс утьыны луонлык сётоз.
Со сяна, страховой учыр кылдон дыръя гуртын ваньбур поттӥсьёслэсь эрикрадъёссэс но тунсыкъёссэс тӥянэз палэнтон понна, депутатъёс страховщиклы ужоскето ёзэсъёсысь утет учыр кылдон но ыштонлэн быдӟалаез пумысен ужкагазъёсты курыны эрикрад сётыны ӵектӥзы, эрико эксепртизаез со радлыкысь поттыны дэмлало.
Тодэ вайытом, 2016-тӥ арын Удмуртиын кӧс куазь сэрен ыштонъёс 800 миллион манетлэсь ятыр лыдъямын.