Удмуртилэсь 2016-тӥ арлы коньдэтзэ 6,75 миллиард манетлы будэтӥзы

Удмуртилэн коньдэтэзлэсь табыш но уже кутоно люкетъёссэ 2016-тӥ арын 6,75 миллиард манетлы будэтӥзы. Элькунысь Кун Кенеш бюджет сярысь законэ сыӵе воштонъёс пыртӥз 27-тӥ куарусёнэ, Владимир Невоструев кивалтэм улсын ортчем сессиын.
Озьы табыш люкетэз 66 миллиард 156 миллион манетозь будӥз, уже кутоно люкетэз — 70 миллиард 456 миллион манетозь. Тырмисьтэм люкетэз азьвыл кадь ик кылиз — 4 миллиард 300 миллион манет.
2 миллиард 810 миллион манет чаклазы коньдэт чотын тыршисьёслы уждун тырыны. Со пӧлын коньдэт сярысь катэн уждун тырыны чаклам резервысь 500 миллион манет.
739 миллион 700 сюрс манет — муниципалитетъёслэн коньдэтъёссылэн люкетэз (со ваньбур понна вытэз тырыны но пӧртэмлыкез ӵошкытатыны мыноз), 473 миллион 600 сюрс манет висъялозы кун пунэмез тырыны.
Мерлык удысын 29 миллион 700 сюрс манет мыноз трос нылпиё семьяослы юрттыны но 36 миллион 900 сюрс манет котыр куинетӥ но солэсь тросэтӥез нылпи вордскем бере кулэяськись семьяослы толэзьлы быдэ тырыны.
58 миллион 400 сюрс манет басьтоз дыкужымъя, жилищно-коммунальной возёсъя но тарифъёсты кун ласянь радъянъя министерстволы дыкужымез шыръян программаосты быдэстон понна. Со пӧлысь 11 миллион 300 сюрс манетэз — трос патеръем юртъёсты быдэсак выльдонъя фондлы, солэн ужез йылэмен валче.
1 миллион 500 сюрс манет — дыкужымлэсь пайдалыксэ будэтонъя ужрадъёслы. 38 миллион 800 сюрс манет — шуныт, ву сётон, вуэз поттон схемаез дасянъя но выльдонъя ужрадъёсты быдэстыны; 6 миллион 400 сюрс манет — дыкужымез шыръянъя инвестици ӵектосъёсты быдэстыны кутэм лизинг тыронъёслэсь оглюкетсэс берыктыны.
6 миллион 800 сюрс манет — промышленностья но вузкаронъя министерстволы.
21 миллион 400 сюрс манет висъялозы нылпиосты школаын сюдыны, 52 миллион 400 сюрс манет — анай-атайёсын тыроно коньдонэз берыктыны но 150 миллион 200 сюрс манет — Ижкарысь «Столичный» микрорайонын выль школалы тӥрлык басьтыны.
20 миллион 400 сюрс манет быдтозы Иж тыметэз чылкытатыны.
Озьы ик 3 миллион 200 сюрс манет котыр чаклалозы Россиысь но калыккуспо ӵошатсконъёсын вормисьёслы стипендия тырыны, 67 миллион 700 сюрс манет — спортъя клубъёслы юрттыны (48,17 миллион манет — хоккеен шудонъя «Ижсталь» клублы но 19,5 миллион манет — «Зенит-Ижевск» клубысь футболистъёслы).
Удмуртилэн Тӧроез кичӧлтэмъя, ватсаса воштонъёс пыртэмын, депутатъёслы соослы дурбасьтӥзы. Табышлы чакламлэсь вылтӥ вуись вытъёс (1 миллиард 250 миллион манет), коньдэткуспо трансфертъёс (102 миллион 200 сюрс манет) но 2015-тӥ арын Кизер ёрослы сётэм уксёлэсь люкетсэ (3 миллион 600 сюрс манет) берыктон чотын коньдэтлэсь доход люкетсэ 1 миллиард 355 миллион 800 сюрс манетлы будэтӥзы.
Ватсаса коньдонэз сётозы лэсьтӥськонъя министерстволы — 1 миллиард манет, агропром огъетлы — 200 миллион манет (со пӧлысь 100 миллион манетэз гидъёс лэсьтыны), 50 миллион манет — тазалыкез утёнъя министерстволы (вылӥ технологиосъя эмъюрттэт сётыны). Калыклы мерлыко юрттэт сётонъя министерстволы — капремонтъя капчиятонъёслы 102 миллион манет (Россиысь вуись коньдон чотын).
Озьы ик азьвыл чаклам коньдонэз люкылон сярысь тупатонъёс кутэмын (ватсатэк):
— гурт возёсъя министерство 37 миллион 500 сюрс манетэз люкылэ агропром огъетысь предприятиосын техникаез но тӥрлыкез басьтэм понна уксёлэсь оглюкетсэ берыктыны;
— лэсьтӥськонъя министерство чотын 11 миллион 800 сюрс манет басьтоз дышетонъя министерство — анай-атайтэк кылем нылпиослы улон инты сётон понна (шыръямын торгъёс чотын);
— нюлэс возёсъя министерстволы 1 миллион 200 сюрс манет сётэмын — нюлэсъёсты музъем вылысен чаклан понна.